早早計劃中: Day2 北京之旅 (上)

四月的北京原來仲係好凍, 早晚温差好大(沒有太陽只得約 3 - 5度) 而日頭時有約15-18度, 一早起來走出門外感受一下氣溫, 它應該比香港最凍之時仲要凍一點... 口中噴得出陣陣白氣

出發前我成日問當地既朋友: 北京而家幾多度, 問左幾次佢都唔答我, 正係同我講而家北京仲好凍. 我係咁引渡佢答即係幾多度, 佢都係叫我著夠衫來. 令人摸不著頭腦, 當時香港是16,17度, 好凍係咪10度以下者?! 來左北京第2日, 我終於唔怪我既朋友了, 因為我亦明白箇中原因, 原來"凍,即係幾凍?即係幾多度?"只可以套用在我地溫差唔係太大的香港. 香港不論早午晚氣溫分別不大, 一日相差幾度可能已經係新聞, 可用一個量化去講解, 今次身在北京, 早上3度中午18度再夜晚3度, 應該點去理解, 點去體驗呢.... 凍即係有幾凍? 答案是, 要著夠衫 XD

由於明天(Day3)要轉酒店入住朝陽區 , 今天的行程會去萬里長城(慕田峪長城)

看過多個網友教路都係用此方法, 我地酒店門外食過早餐, 9點幾開始出發, 步行5分鐘到達灯市口站,坐地鐵到東直門站B出口, 再乘坐916快 (頪似坐旅遊巴, 約一個小時多到達, 好似16個站)

大約11點多, 到達懷柔北大街下車, 一下車已經有3-5人問我地係咪去慕田峪, 二話不說找其中一位司機問價錢, (其他的司機們即時會走開), 呢位司機大哥開價$60前去, 我當然即問咁來回呢? 他回答$120可以係長城等和接我地回懷柔北大街 .

(呢點好重要, 要佢主動提出可以留在長城等我地再接我地回懷柔北大街回程坐巴士)

在黑車的路途上 (用黑車呢個字眼, 我地香港人可能會好驚, 但大陸好common的, 其實即係比錢請一位司機坐私家車, 比坐大陸的士更加入舒適, 我覺司機渣車比大陸的士更加安全 XD ).

時間已差不多11:30AM, 跟司機大哥細傾一下周遭, 再胆粗粗的問大哥可否先送我地到路途的餐廳先午餐, 因為我地怕慕田峪沒有用餐地方, 果然, 正如網友提及, 司機大哥好好人, 由他介紹,先送我地到途中餐廳午餐 (到慕田峪只得一條直路, 路上有許多餐廳 )