#好有共鳴
喺英國探親咗個幾月, 經過熔斷機制, 再加埋酒店隔離七日, 終於返嚟香港屋企啦。
突然間,唔慣通街啲人戴口罩 ,我喺嗰邊雖然有戴口罩，但係眼見通街啲人冇戴口罩 ，
另一感覺, 通街都係華人 ,喺英國. 通街都係西人, 就係返咗自己地頭.
上次講過, 英國 (倫敦以外) 好難搵廁所, 搵到廁所, 好多都係要收費, 收費嘅廁所 ,都係清潔一般. 唔似得香港嘅商場廁所, 又乾淨, 又靚.
上次係列斯去到一處維園咁大嘅公園，當然係搵極都唔會有廁所 ,見到當地啲女人,圍住條大毛巾，行入草叢嗰邊行, 都係就地解決㗎喇.
香港交通燈好舒服,向前上望,睇到綠公仔.又會有嘟嘟聲 (計時) 提示你.
喺英國就要左右望, 唔方便,仲要計埋單車紅綠燈, 即是又要等耐啲.
而家係香港天氣暖好多 , 到商場裏面有冷氣, 係英國未感受過.
香港開始熱, 泳池啱啱開放, 可以游水.
去英國啲酒店, 未見過有泳池， 又真係冇諗過喺嗰邊游水, 嗰度啲天氣凍, 就算見到有太陽, 都係凍。
返嚟香港精神曬, 三個電視台任你撳， 我重裝咗Now TV, 睇埋英超, 場場睇, 有埋廣東話評述, 好Happy !
諗返上個月喺英國冇電視頻道可以選擇, 真係慘呀!
行過麥當勞, 肯德基, Burger King, 唔使諗咁多, 想食就食啦, 應該係全世界最平嘅地方之一.
而家又開放到有八人一台, 晚晚出街食, 都冇問題, 就算外賣三餸飯 都超平,唔使自己煮.
上個月, 除咗自己煮, 夜晚都冇啖好食, 又貴,
有一次, 冇乜選擇地食咗餐日本菜, 三個人叫咗兩個定食, 一碗拉麵, 快餐店嘅裝修, 盛惠五百蚊 ，同香港外出食飯, 真係兩個世界.
真係發覺香港嘅地鐵線一流, 四通八達, 價錢又平, 屯門去馬鞍山都可以唔使轉車添, 而家仲開埋會展, 金鐘站, 交通方便到飛起, 同其他冇地鐵嘅英國城市, 例如曼徹斯特同埋列斯.,不可同日而語, 真係慳好多時間.
另外, 不可不提, 上次喺留言區，我有講過 ,我同太太揸住四大個行李喼,去到曼徹斯特Piccadilly 火車站, 落車返酒店, 竟然係搵唔到扶手電梯,同埋電梯, 嗰條樓梯3樓咁高, 真係慘.
電梯呢啲咁基本嘅嘢, 就算喺倫敦嘅地鐵, 都會可能發生.
嚟到英國, 都想望下唐人街， 曼徹斯特得嗰兩, 三條街, 有幾間食肆, 麵包餅店, 中式超市 。
利物浦嘅唐人街, 就係得嗰100公尺咁長。
都有幾間中式食肆。
列斯搵唔到唐人街, 極其量有間大型中式批發超市連埋中式大酒樓一齊。 市內都有三, 四家中式超市。
啱啱返嚟, 立即飲早茶, 早晨孖寶33蚊 再加茶錢囉, 起碼有人招呼, 有冷氣坐得舒舒服服.
早午餐喺英國便利店 Meal Deal 都要3.5磅 ( 三文治+ light 小食, 加包嘢飲) take away.
坐低食英國西式早餐, 又要5,6拾蚊囉.
返到嚟梗係約下啲波友踢波,
講開踢波, 喺英國都跟過一個親友去踢波,
平時香港我哋踢波, 夾錢畀場租，日間十蚊左右, 英國嗰度，夾錢踢波要夾6磅 , 都貴6倍喎。
另外, 都有啲好嘢嘅, 嗰度買 :雞蛋, 肉類, 朱古力, 雪糕, 汽水, 啤酒, 薯片, 應該係平過香港嘅, 嗰度可以用£3.69 買到一大包薯片, 裏面有30細包, 個別大型超市, 甚至有一大包50小包畀你買, 汽水£2磅 有三公升， 相信喺度住多一排, 都應該肥咗一個碼。
好多人話要去英國, 係為咗啲仔女讀書, 啲仔女讀書, 使唔使你成家陪佢去埋英國呀 , 呢度適宜讀書, 可以旅遊，不宜長住，真係悶到你抽筋.
有好多人留言話畀我聽嗰度有民主, 自由
我喺嗰度生存咗個幾月, 得出嘅結果係:
自由到好自由, 自由到冇人理你, 你存唔存在, 社會冇人會關心你, 冇人同你發聲, 自生自滅. 亦都好難喺嗰度尋求發展嘅機會, 因為你係黃膚色嘅華人, 升職較難.
一係就去創業, 做下飲食, 做吓中下階層嘅勞動工作。
以西方演繹嘅民主, 少數服從多數, 你去到英國就係極少數, 民主係唔關你事, 你係被放逐的一群, 自生自滅, 你唔好搞佢, 佢係都唔會理你。
最緊要, 抵得悶!
或者可以咁講: 自由同埋悶, 你自己揀啦！
我返咗嚟就甩難, 又自由, 又自在 ，
咁多節目, 咁多老友, 自己地頭, 又點會悶呀!
No comments:
Post a Comment